zondag 6 januari 2019

Effen alene...op Oldjoars oavend

Ik heb gin mense zene onderweg en gin mense mien dat was misschien moar goot ok
Traditiegetouw go we-j met de familie en wat der zo al bi-j an hunk op oldjoars-meddag carbit scheten, dan is bi-j ne enen dan is bi-j andern en no dan in Balle an de Straksweg. Dat is altied bastend gezellig en behalve knappen dow ok een paar biertjes drinken ouwhoeren en wat hamburgers op de plate. No dacht ik an het end van de meddag dat mien dochter wal terug zol vuurn met de auto……moar dat hew achteraf neet goot af esprokkene bleek wal, zee was al lange weg, en zo kwam ik half achte erachter dat ik alene noar huus moste. No loop ik toch geerne zeg ik nog en och 10 kilometer mot kunnen op oldjoarsoavend en ik bun gin watjen dus loat mien neet ophalen.

No had ik mien hardloopspul neet bi-j mien, nee gewoon de bouwschone en een olden jas. Iedereen dan moar tju ezegd en op pad eerst een stuksen wandelen tut an de harde weg. Ik begin uut vanzelf hard te lopen en loop deur tut an de Bullenssteeg….man dat lup neet best en goa weer wandelen, zol het van de schone kommen der zit immers gin veters in of is de jas te warm. As ik goa wandelen kom ik dit joar neet ens meer thuus bedenk ik mien zo… dus over in de dribbel no tut an het verloaten asielzoekcentrum en weer hetzelde , jonges dat is gin doon zo.

Ik kiek um mien hen,wat zollen leu wal neet denken as ze mien zeet…der leep een kearl in het donker met ne oldel jas en bouwschone zonder veters op oldjoasoavend hard te lopen, dat duch neet, en as ik goa wandel denk ze vast den lut de hond nog effen uut, moar hef geen hond bi-j zich, dat duch ok neet. Ondertussen geniet ik wal van het veulle vuurwark dat toch af en too een betjen licht guf op mien duustere zandpad van de Deunkdiek en zo bunk al bijna op de Nijhofsweg en zee de lampen van de Dommen Anleg al.

Dit is effen een makkelijk stuksen en, kan goot zeen met alle stroatlanteerns en loop langs den dommen dwars oaver de Hamelandroute en bedenk wat te doon… Het richtste is recht an deur het Klooster in, moar ok akelig donker……deur Bredevoort is veulle better alleen een heel end umme en het duurt mien al zo lange.. Ik besluut dan toch maor rechtan te goan en zet de pas der goot in, ik stoa alleen halverwege de harde weg effen stille bi-j de oavergang van de gemeente Aalten en Wenterswiek, wat een verschil in asfalt, het kan dus wal …denkend an het ni-je asfalt van de Lichtenvoordse stroatweg.

En zo schut het op, alweer bi-j Meerdink dan rechtdeur een stuksken oaver van het pad van de 2 Bruggenloop en zee an de linkerkante de laatse lempkes van Johan Oonk en dan is het echt donker. Ik zee geen bast en ok de plesse op de weg neet as ik oaver de kwekerije van Geurking loop, now bun ik doar aardig bekend en toch wet ik neet precies woar ik bun. Ik mot in een keer an wolve denken…zoln dee mensen in de konte bieten….specialisten zegt dat ze dat neet doot, 150 joar gin wolve had in Nederland, now bunt der een paar en meteen hebt leu dee der verstand van ….het zal

Ik smoks wieter deur en langs de de buskes en zee in de wieten de lampen schienen van de 2 Bruggen, as ik doar moar is bun ,dan bunk ok bijna thuus. Gelukkig steekt leu op de camping nogal wat vuurwark af wat toch een betjen het oldejoarsgeveul noar boven breg. Zo nog een klein stuksen en dan bun ik op het fietspad van de Pieriksweg nog een kilometer en dan bunk der. Heb anderhalf uur gelopen het joar kunnen overdenken, ik wet 1 ding al wal ….dak oldjoarsdag 2019 wal iets duudelijker afspreke. Het is inmiddels rond negen uur as ik thuus ankom, ik heb gin mense zene onderweg en gin mense mien dat was misschien moar goot ok. 

Ernst Jan Luiten

1 opmerking:

Marco (Barlo) zei

Potverdikkie nog an too zeg. wat nun helse tocht haje maakt zo op den letste dag vant joar. fijn daj goat tuus gekommen bunt.