Zwarte Cross 2024 - vrijdag 2e dag

Ernstjan Luiten en Gerdie Duenk

Ok we-j  waren met een delegatie afgereisd noar de zwarte cross um ons in te zetten as camping gastheer en gastvrouw …we-j waren dan moar met zien beiden van Ava .., althans mear hew der neet e-zene . En net as de donderdagploeg mosten we-j ons ok in het gemeentehuus op de camping melden bi-j ene Carmen.. nogwat .

Wat komt jullie doon vroog iemand met een oranje T-schirt  wee zich veurstellen as de burgemeester. He was woarschienlijk belangrieker dan w-j met ons pearse T -shirt. Dat wet we-j neet …we mosten ons melden bi-j Carmen…

Melden bi-j Carmen is ongevear hetzelde as dat een broekie zich veur de dienstplicht mot melden  in het leger  bi-j de koning …. en dan denkt  dat Willem der zelf steet in zien greune pak.  De burgemeester had een portofoon en een oortje in en vroog zien chef um wark veur ons .. Mooi zol dan wezzen dat he ok antwoord kreeg …moar dat kwam neet

Noa een uur koffie en fris drinken en een lunchpakket achter de kiezen. Goat jullie moar op de camping vuulniszekke uutdelen was onze opdracht  en kregen beide een rolle toeten met. Et zol kunnen weazen dat er wat prut is weg e-waaid of dat er wat noast de bak zol liggen en dan is een zak wal makkelijk …was mien gedachte.

Op de camping was het op dag 1 al een varkenshok met een ongeleufelukken pruttel …. De  campinggasten keken zo wazig …of ze nog nooit een vuulnistoete hadden e-zene. Een paar keer hew veur e-done dat de zak een onder en boavenkante hef en dat hier eventueel prut in zol kunnen …. mission impossible

Umdat zekke uutdelen  gin zin had of dat sommigen  er al 3x wat hadden gekregen en…  ze gin ander wark veur ons hadden …kreeg  wi-j de opdracht: Goa dan moar rondlopen op de camping en preutjes maken veur de goeie sfeer… moar i-j mugt neet het festival terrein op. Gerdie wist oaveral de weg…hier kuj binnendeur …doar kuj een pette kriegen …de crewbar had gratis bier… De rest van de dag buw op het festival terrein e-west

Ernstjan Luiten

Rennen mat Kast

De groep atleten veur de Kastboom op de Aaltense Markt

Willem schuf de gordienen nog iets wieter an de kante ..

doar kwam geleuf ik wat… an ?

Loat mien ok is kieken, goa is an de ziet… zeg ziene “Mien” dan.

No stoat ze met zien beiden deur het raam te loeren

Wat zag i-j dan ..of buj moar wat an het ouwehoeren.

Nea ..ik zag wat flikern rood wit en greun en een fietse joog er achteran.

Zee gingen linksaf en toen weer rechts dan wear recht an deur, 

en…verduld doar komt zo nog een kere an.

Wee bunt dat toch.. en wat zollen ze zeuken ?

wat komt ze toch doon ?

Et vrus buuten dat et knapt, dit geleuf i-j neet gewoon.

Ik kleed mien warm zet de pette op en goa der achter an ,

dit is neet normaal.. want no loopt ze zelf deur Beth San.

Willem volgt stillekes et spoar en is zowat deur heel Aalten hen en wear ewest ..

geet noar huus  dut de gordienen dichte en vunt het ok best.

Het waren leu van AVA`70 “Mien” en dee volgt met kast de mooist versierde stroaten,

Dee loopt altied “Mien” …altied … dat kunt ze no eenmoal neet loaten.

Ernstjan Luiten

A'j plat kunt praoten moj't neet laoten - deel 8

Sport verbroedert

Op de leste dag veur de ni-jje 'lock down' heb ik samen met de twee Anne's van Loopgroep Zandloper en Jan Rademaker van AVA'70 met-edaon an de Deo-Loop in Borculo van  12,7 kilometer, 'n  samenwerking tussen twee plaatseleke loopverenigingen.

Jan en ik kennen mekare goed uut mien AVA-periode. Wi-j  hebt völle samen etraind en ok mooie wedstrieden elopen in binnen- en butenland. Op 't leste loopjen van 2021, wazzen beide Anne’s getuge van “de opa’s vertellen van vrogger”. De anekdotes bunt toevalleg 'poep-en-pies-verhalen, maor daordeur niet minder smeuïg.

De lange opa was in wedstrieden altied net wat sneller dan de wieze opa. Op 'n zondagmorgen in Baek, stond 'n 10 kilometer-heuvelwedstried epland. Vier rondjes van 2,5 kilometer met zo’n anholdende vervaelende bult d'r in. Op de leste bult liep de lange bi-jnao met de neuze op de grond. De wieze zag zien kans schoon en haalden de lange zo snel in, of dat hi-j 'm teggenkwam. De lange had nog 'n paar honderd meter um 'n paar keer te slikken, en dan de wieze “oprecht” te feliciteren. Nao 't uuthijgen was de wieze man onvindbaor. Toch maor effen terugdribbelen um 'm te zeuken. Van achter 'n paar dikke beume zag ik 'm zwaaien en ropen “breng mi-j effen een flesken water”. Deur de ontspanning of 't plezier, had hi-j honderd meter veur de finish plots 'n niet te holden buukloop ekreggen.

Een estafette in Essen, twee rondjes van 21 kilometer rondom de Baldeneysee. Met vier AVA-70 lopers, ieder  10,5 kilometer. Loper 2 en 4 werden met 'n boot het meer ovver-ezet, zodat ze bi-j de 10,5 en de 32 kilometer loper 1 en 3 konnen aflossen.  Jan was loper 3 en ondergetekende mocht de laatste etappe afleggen naor de finish. A'j 32 kilometer bi-j 'n wisselpunt mot wachten, dan is een toiletbezuuk niet te vermijden. Angezien d'r gin dixi anwezeg was, liep ik daorveur 'n stuksken het bos in. Angezien Jan sneller kon lopen as ik kon pinkeln, ston hi-j in 't wisselvak te wachten. D'r werd bliekbaor al 'n antal keren um-eropen 'Hernn Mengers, wo sind Sie? ' Jan dech nog steeds dat wi-j op dat moment 'n podiumplek verloren hebt.

Deur vermoeidheid of deur verbazing wazzen beide Anne’s bi-j de Deo-Loop heel stil bi-j “opa’s verhalen”. Hun gezichtssuutdrukkingen gavven daoraover meteen dudelekheid.

Henk@LG-Zandloper.nl

A'j plat kunt praoten moj't neet laoten - deel 7

Lange-afstandlopen

Ik neum mi-jzelf nog altied 'n lange-afstandloper. Veur de halve marathons klopt dit nog wal, maor mien leste hele marathon is inmiddels 10 jaor gelaene.

In 'n hele of halve marathonperiode is het verstandeg um in 'n stabiele laevensfase te zitten. Naost zo’n veurbereiding en ow dageleks wark blif  d'r weineg tied en energie aover veur andere bezegheden. “I-j doet 't goed, of i-j doet 't niet!”

Halve Marathon:

De 21,1 kilometer is 'n prachtegen afstand um in wedstriedverband te lopen. As de basisconditie op peil is, dan is dizze afstand goed te lopen. Bi-j de “halve” raak i-j meestal niet helemaol uutgeput. Ow herstel duurt relatief kort. In zo’n wedstried zit alles wat veur mi-j 't lopen zo interessant maakt. I-j  mot en/of i-j mag consequent dri-j keer in de wekke de hardloopschoenen antrekken, i-j hoeft niet zo heel völle op snelheid te trainen en i-j könt regelmaoteg 'n beheerste 10, 15 of 16,1 km.-wedstried as veurbereiding lopen. Tactisch gezien is dizze afstand ok erg leerzaam.

Rusteg starten um in de goeie energiebron te kommen, daornao zet i-j de snelheid vaste en probeert 'n mooie samenwerking met andere lopers tut stand te brengen. Van zeg maor de 4 t/m 17 kilometer kö'j in zo’n flow kommen, dat 't volop genieten is. De leste kilometers vind ik 't persoonlek fijn um de “verantwoorde grens” op te zuken, bi-j veurkeur bunt dit de snelste kilometers. Bi-j 't passeren van de finishlijn is d'r dan volop bli-jheid !  

Hele Marathon:

In 2004 heb ik mien eersten marathon in Rotterdam elopen. Ik krieg nog steeds kippenvel as ik hieran denk. Met duzenden mensen in 't startvak samen “You Never Walk Alone” zingen en dan aover de Erasmusbrug 't avontuur opzeuken. Totaal heb ik 8 hele marathons elopen, waorbi-j Dublin de mooiste was, en Antwerpen de leste en ok dén waor ik mien gestelde doel van 3 uur en 15 minuten heb ehaald. Geduld en ervaring bunt eigenschappen die zelfs op latere laeftied nog veur 'n goeie prestatie könt zorgen. Mien geluk was toen 't hebben van 'n verstandege trainer den heel goed de balans tussen inspanning en ontspanning in de gaten hield. En tut mijn grote vreugde heb ik altied met  'n fijne groep atleten de veurbereidingen möggen doon.

As trainer belaef ik de veurbereiding op de halve en hele marathons helemaol anders. Ik vind 't mooi um lopers te helpen hun doel te bereiken en meteen veul ik 'n soort verantwoordelekheid waor ik nog steeds goed met mot leren umgaon. 't Plezier en enthousiasme wat ik bi-j de begeleiders en lopers zie, gif mi-j toch zovölle voldoening, waordeur ik mi-j steeds weer verheug um zo’n lange-afstandstraject op te starten!

Henk@LG-Zandloper.nl

A'j plat kunt praoten moj't neet laoten - deel 6

‘t Löp zoas ’t löp

Op aodem kommen.

I-j heurt wal 's zeggen “maak ow 's drok!” dan bedoelt ze neet, da'j hard an 't wark mot, maor da’j  't effen mot laoten gebeuren. Ze neumt 't ok wal op aodem kommen.

Tiedens het hardlopen ku-j good op aodem kommen. I-j begint heel rusteg te dribbelen en holdt ow allene maor bezeg met 't oetaodemen. Van owe mond maak i-j een “brevenbusje” via de spleet tussen de lippen blaos i-j actief aodem oet. De oetaodeming zo lange meugelek verlengen. A'j inaodemt lao'j 't lichaam 't zelf doon. Bi-j dizze manier van aodemen, kump de zuurstof depe in ow boek. 't Lichaam is zo slim, dat 't zorgt veur een goeie verholding tussen zuurstof en 't uut te blaozen koolzuur. A’j gaot versnellen of  vertragen dan past 't lichaam 't antal aodemhalingen per minuut vanzelf an.

’t Veurdeel van hardlopen is dat dizze manier van veurtbewegen en ’t prakkizeren neet good samen gaot. Ik heb de ervaring dat nao unze trainingen mensen misschien wat vermoeid bunt, maor een stuk meer ontspannen. An 't begin van de training heur ik meer ovver wark praoten dan nao afloop.

Gezond older worden hef veur 'n deel te maken met anleg, maor veur 'n groter deel met ow laevenswieze. Verantwoord etten, oppassen met genotsmiddelen, ontspanning en genog bewaegen bunt bekende uutgangspunten. Twee van bovvenstaonde andachtspunten zit in verantwoord hardlopen.

Hol ow good! Henk@lg-zandloper.nl

A'j plat kunt praoten moj't neet laoten - deel 5

‘t Löp zoas ’t löp

Mien veurege stuksken had ik af-eslotten met “Hoo 't fysieke en mentale soms wal good en soms wat lasteger met mekare warkt. ”

Unze ademhaling, dus zuurstofopname wordt an-estuurd deur de hersenen. Dit geet automatisch, door heuve wi-j gelukkeg neet bi-j nao te denken.

Sinds wi-j steeds minder fysiek wark doot, is d'r een probleem ontstaone. Uns heufd denkt dat wi-j heel arg drok bunt, maor dit is heel vake zittend wark, “belangriek kantoorwark”. De evolutie is nog neet zo wiet dat e 't verschil tussen fysiek en mentaal wark van te veuren wet.

Dus d’r ontsteet 'n situatie dat 't zuurstof de snelle sukers anstuurt um flink an 't wark te gaon, terwijl wi-j misschien allene maor denkt “wat bun ik toch drok”. I-j könt ow veurstellen dat de balans in 't lichaam verstoord wordt. Tot gevolg da’j ow onrusteg en gehaost gaot veulen.

A’j veur da’j an 't wark gaot, eerst naodenkt ovver de inspanning, dan wet i-j dat dit wark genog hef an de zunege vetverbranding, dan blief i-j in de passende zuurstof- en dus energievoorziening.

De vermoeide held:

'n Veurbeeld:  A’j rusteg op de banke zit, dan he'j an minder dan 10 aodemhalingen per minuut genog. 't Lichaam wordt dan an-estuurd deur de bi-jnao onutputteleke vetveurroad. Opens bedenk i-j ow “ik mot nog dit en nog dat” en opens he’j  meer dan 15 aodemhalingen per minuut neudeg, en vanzelf gao’j naor de beperkte sukerverbranding. Met een paar uur is dizze snelle brandstof op, en dan mo’j um 11 uur wat zeutegheid. An ’t end van de middag en aovend herhaalt dit zich nog 'n kere.

As dit proces lange tied zo anhöldt, rake wi-j langzaam uut-eput. Vake zee ik dat bi-j de perfectionisten onder uns. Ze bunt veur iederene good, allene denk ze wat minder an zichzelf.

Dit neumt ze ok wal Vermoeide Helden!

De volgende kere vertel ik iets ovver hoo’j daor met umme könt gaon en ok wat hardlopen daorin kan betekenen.

Hol ow good!    Henk@lg-zandloper.nl

A'j plat kunt praoten moj't neet laoten - deel 4

‘t Löp zoas ’t löp

As hardlooptrainer hol ik natuurlek de vakliteratuur bi-j. ’t Is wal lasteg um 't verschil te zeen tussen objectieve informatie en verhalen met commercieel belang.

In de leste Runnersworld las ik een quote dee zondermeer past bi-j de belangriekste uutgangspunten van Loopgroep Zandloper “samenbrengen van mensen waarbij de mentale en fysieke gezondheid centraal staan.”

De lichameleke veurdelen bunt denk ik wal algemeen bekend. Conditie, spierkracht, botdichtheid en natuurlek motte wi-j het onderhold van 't immuunsysteem ok neet onderschatten.

Mentaal is wat lasteger te begriepen, maor de wetenschap hef de leste twinteg jaor al het neudege van 't raodsel ontrafeld. Veural duursporten bliekt een positieve invloed op onrust en ’t prakkizeren te hebben.

‘k had al enkele jasoren last van een burn-out, ton ik in 2000 bi-j een psychiater kwam en hee mi-j vertellen ovver een onderzoek van Dr. Ruud Bosscher, waorbi-j de relatie tussen een vol heufd en een duursport was an-etoond. As fanatiek volleyballer zat ik daor natuurlek neet op te wachten, maor as hee mi-j ezegt hat da’k iedere dag een uur handstand most doon, dan had ik ok eluusterd.

Jan te Brake sr. was toovalleg op bezeuk bi-j mien buurman Jan jr. Ik dacht lao'k metene maor vraogen waor ik mot waen om mi-j bi-j AVA '70 an te melden. Jan sr. hef mi-j later wal eens ezegd, dat hee ton dacht “dat wordt er geen ene”. Nao een moeizame start, kreg ik al snel de smaak te pakken.

Um nog terug te kommen op de belangriekste uutgangspunten: fysiek fit worden, had ik wal verwacht, en tot mien verrassing hef mien heufd d'r ok völle baat bi-j.

Ik heb völle verschillende opleidingen evolgd, maor de opleiding tot running-therapeut hef het meeste indruk op mi-j  emaakt. Hoo het fysieke en het mentale soms wal good en soms wat lasteger met mekare warkt is een interessante vraog. De kommende kere zal ik wat uutgebreider ovver dit onderwerp schrieven.

Hol ow good!  Henk@lg-zandloper.nl

A'j plat kunt praoten moj't neet laoten - deel 3

‘t Löp zoas ’t löp

De veurege kere heb ik 't ehad ovver gebroek van vet- en/of sukerverbranding tiedens 't hardlopen. Noo klunk 't net of i-j könt kiezen welke brandstof i-j gebroekt, maor dit is maor gedeeltelek waor. I-j hebt wal wat sturing deur owwe aodemhaling.

Völle trainingen do'w in een rustege ontspannen aodemhaling. Hierbi-j put i-j veur een belangriek deel uut de riekelek gevulde vetveurraod. Disse conditie-opbouw neume wi-j “capaciteitstrainingen”.

Een klein deel  traine wi-j maor op snelheid, de zgn.  “drempeltrainingen”. Bi-j dit snelheidswark geet 't lichaam vanzelf ovver op sukerverbranding.

Bu’j wat drok in ow heufd, probeer dan eerst te ontspannen veurda-j voluut gaot hardlopen. Dit kö'j doon deur actief de uutaodemhaling wat te verlengen (deur getuite lippen), de inaodeming lao'j 't lichaam zelf doon.

An ‘t ende van een training of wedstried zol ik adviseren um good uut te lopen. Wi-j holdt altied minimaal 8-10 minuten an. I-j gaot dan automatisch terugge naor een ontspannen aodemhaling en meteen dus een ontspannen geveul in ow lief en heufd.

Toppers dee in een wedstried 20 kilometer per uur loopt, dee doot hun meeste trainingsrondjes rond de 14-15 kilometer per uur. Loop i-j in een wedstrijd bi-jveurbeeld 12-13 kilometer per uur, dan is 11 kilometer per uur trainen natuurlek neet zo’n good idee. Duurloopjes op 75% van ow wedstriedtempo is hard genog um de conditie op te bouwen.

't Mooie is dat veurnamelek rusteg trainen gezond is. I-j hebt minder kans op blessures en dat is ok een belangriek onderdeel van veuruutgang. Ik zol zeggen, probeer 't 's een tied, en  i-j zölt zeen dat 't resultaat gef.

Henk@lg-zandloper.nl

A'j plat kunt praoten moj't neet laoten - deel 2

't Löp zoas ’t löp.

Waorumme loop ik de ene kere as 'n kievit en de andere kere of ik 'n köttel in de bökse hebbe?

Kö'j denken dat ’t an de vorm van den dag ligt, maor ’t hef meer kans dat ie met de verkeerde energieleverancier op pad bunt. In normale omstandegheden he’j twee soorten energie beschikbaor, gemakshalve neum ik dat de vetten en de sukers. In combinatie met zuurstof könt dee beiden 'n bulte brandstof leveren. Allene op de vetten kö’j al enkele waeken laeven a'j maor genog drinkt. Dat geldt zowal veur slanke as volslanke leu. Met sukers kö’j volop presteren, zowal met ow wark as bi’j 't sporten. Helaas he’j van dit snelle spul maor veur 'n paar uur inspanning genog.

Azze wi-j d’n hele dag al drok bunt ewest, dan he'w al regelmaoteg de sukers motten anvulln um de tied good deur te kommn. Dan wille wi-j  's aovends ok nog presteren, maor dan blik da’w de piepe al läög hebt (de snelle sukers bunt nog neet voldoende an-evuld).

A'j de hardloopschone antrekt dan mo’j veural de eerste twaalf minuten heel rusteg andoon, zodat ow “vetmotortjen” an-ezet wordt, daornao kö’j wat versnellen. Noo is d’r 'n combinatie van vetten en sukers an 't wark. Waneer i-j an ’t ende rusteg afbouwt tut in de vetverbranding,  dan kom i-j met 'n ontspannen geveul weer bi-j huus.

Deur uns jachtege laeven beginne wi-j 's morgens vrog al uut unze sukerveurraod te snoepen. Unze rume vetveurraod blif op plekken zitten waor wi-j 't lever neet hebt. 't Liekt mi-j dudelek da'w d’r soms anders met an mot.

Bi-j 'n rustege en ontspannen aodemhaling zette wi-j 't “vetmotortjen” an. Make wi-j uns te drok, dan gaon de aodemhaling en hartslag umhoge, hierbi-j blif 't vet lekker zitten en gao'w automatisch ovver op de sukers. Aover wat dit veur consequenties kan hebben, zal ik de volgende kere iets  schrieven.

'n Ontspannen en prettege tied ewenst.                                                           

Henk@LG-Zandloper.nl

A'j plat kunt praoten moj't neet laoten - deel 1

't Löp zoas ’t löp.

Vrogger toen d'r nog hardloopwedstrieden wazzen, heurden i-j, bi-j de wat grotere evenementen, lopers in völle talen sprekken. Duuts en Engels kon ik nog wal begriepen, maor as 't Keniaans of Somalisch was, dan reageerden ik alleen met 'n klein knikje.

Mocht ik bi-j 'n loop in Rotterdam of Nijmegen ons mooie dialect heuren, dan spitsten ik mien de oorne en sprak diegene meteen an. Dit is 'n bekend verschiensel, misschien he'j dit op vakanties ok wal 's met-emaakt.

In de völle waekelekse trainingen die ik verzorg, is mien voertaal standaard 't Achterhoeks dialect. Inmiddels is dat 'n mix van Wenterswieks, Veldhoeks, Aaltens en van sommege uutdrukkingen “oorsprong onbekend”. t Schient dat ik nogal 's in herhaling val, dat zie 'k in dit geval dan maor als 'n veurdeel. Now is 'r bij een van de groepen 'n Belgische anwezeg. 't  Is  veur uns beiden 'n uutdaging um mekare te verstaon, of better gezegd, um mekare te begriepen.

Bi-j 'n ni-je groep, vraog ik an 't begin altied wal of mien dialect 'n probleem is. Enkele jaoren gelaene bi-j 'n loopclinic in Vasseveld ha'k dit ok netjes evraogd. Zoas gewoonlek kwam d'r gin reactie. Halverwege de training kump d'r 'n dame bi-j mi-j: “Ik heb geen idee waar je het over had”, zei ze.  'Ik had 't nog wal netjes evraogd' zei ik, maor eur reactie was:  “deze vraag had ik ook niet begrepen”.

Ik denke en praote in 't dialect, maor mien platte schriefkunsten bunt minimaal. Mijn goeie vriend Johan Scholl kan dan niet hardlopen maor den kan 't wal heel goed op papier kriegen. 

Henk@LG-Zandloper.nl